Storms and people can mess up you life

Mar 07, 2018 Dem Boys Seh, Features / Columnists

Old people seh not all storms come to disrupt you life. Some does come fuh clear de path and others does come fuh clear you out de path.
Politicians are people who does disrupt you life. De religious leaders does come fuh clear de path while de scamps does come fuh clear you out de path.
Old people also seh people does come in you life fuh a reason, a season or a lifetime. Dem boys seh dem who deh in you life fuh a reason is fuh mek you pull out you hair, or to mek you go to jail or to kill somebody.
Is like dem politicians who come and confuse you; dem thief from de treasury which is de poor man money and pack up dem bags and leff.
De Pee Pee Pee is a clear example and dem want come back.
Then you have those who come in you life fuh a season. Dem does give you some happiness in yuh life and suddenly dem does tek way more than dem bring.
Is like a woman or a man come in you life, mek you fling up you foot high, high, and when dem lef you barely got clothes pun you back.
Exxon doing de exact thing to Guyana. Dem come in de country fuh a season and it seems a lot of people happy.
When de season over and de jamoon and mango done from de tree, white mouth gun tek over.
Then you got de people who come fuh a lifetime. Dem is you family who would stick wid you through thick or thin.
You don’t have to raise you foot fuh dem. Dem gun watch you back; mek sure you always eat a piece of de bread, even if is de crumbs.
Dem is de people who wouldn’t rob you blind.
Talk half and be careful id de people you got around you.

Discover more from Kaieteur News

Subscribe to get the latest posts sent to your email.

Latest News