Cry fuh yuh own calf and Guyana is a calf

Aug 09, 2017 Dem Boys Seh, Features / Columnists, News

From de time he start he political campaign fuh de presidency, Donald Trump start talking ‘bout putting America first. People couldn’t vex wid him, because is always nice when people put dem country first. But some people does tek this thing too far. ExxonMobil come and dem boys want to know if it gun put America first and lef Guyana like Cinderella – like wha people seh it do wid some other countries.
That is why dem boys seh Soulja Bai got to put Guyana first. He is de one controlling wha Guyana gun do when Exxon start to bring up oil and gas. He can’t allow Exxon to do stupidness. After all, everybody know that each cow does cry fuh it own calf. Soulja Bai got to cry fuh Guyana.
He Ministers got to cry fuh Guyana too. Dem boys hope that when dem cry is not fuh dem pocket, because some things happening that got dem boys thinking funny things. Dem notice how some people quiet about certain things when it come to Exxon. After all, it was Soulja Bai who start talking ‘bout transparency. When he was getting ready to kick out Jagdeo, he promise that everything he do gun be made known to de public.
Well he still silent on de contract he sign wid Exxon. Everybody want to see it. Even de Chat-3 talking, although when Jagdeo sign de first one, he and all keep it secret.
Dem boys want to know why Soulja Bai not releasing de contract. When you tek Exxon track record into consideration, he got to release de contract suh people can’t seh dem get kak.
By not releasing de contract, dem boys want to know wha Soulja Bai hiding. It can’t be that Exxon got any secret for him, because he is a man who don’t do nutten wha he can’t do when everybody looking. He not like Jagdeo, who so accustom to hiding everything that at one time people use to call him hide and seek—hide wha he collect and seek more than he pocket can hold.
Dem boys want to believe that some people who had early dealings wid Exxon get something to put in dem pockets and that is why dem and all silent.
Talk half and mek sure you calf name Guyana.

Discover more from Kaieteur News

Subscribe to get the latest posts sent to your email.

Latest News