Hard to forget Jagdeo on Good Friday

Apr 14, 2017 Dem Boys Seh, Features / Columnists, News

Today is Good Friday. Is not a day when people should be fighting. Even in Jerusalem wheh dem got Jews and Muslims dem does call it a day of people. No quarrel does happen.
Is de same peaceful chain reaction that blanket de whole world does tek over Guyana. Is a day when people shouldn’t cuss anybody, not even you neighbour. But Jagdeo does always got people mekking him an exception.
Dem boys want de world to know that dem did plan to lef de man alone, but de things he did and wha he continue doing, mek dem boys can’t shut dem mouth on him.
Only yesterday when dem boys ask Li’l Joe about de Amaila Falls contract he seh how Jagdeo did claim that he hand over de contract pun a CD. To dis day de govt ain’t see no CD, and dem don’t know if dem ever had a contract.
Nuff money spend pun de contract. De road alone cost US$41M-plus and now dem telling people dem don’t know wheh de contract deh. And Guyana sit down and tekking this.
Dem boys seh de contract wha Jagdeo sign wid FIP Motilall, de man that flip and didn’t bruck ee neck, de man who never build a toilet, woulda get de US$800M deal fuh build de falls. Guyana woulda been paying by dem nuts if dem boys didn’t expose that wholesale crookery.
And nobody can deny that Jagdeo is not a crook, Fuh doing that to Guyana he shoulda been nail pun a crass. After all was Good Friday that dem crucify two thieves near Jesus, dem boys friend.
Last night, an MP from Kanuku seh in parliament how Jagdeo selfish, how he never care fuh anybody else but heself, friends and family.
De MP seh if Jagdeo did care fuh dem in Kanuku de place woulda name Kanuku ville and Roraima ville. Dem in town woulda even see a Sophia ville.
Jagdeo give heself Pradoville One and ee tek Pradoville Two fuh heself.
Dem boys still can’t forget de US$27M he spend pun computer. De computer cost less than US$40 but Jagdeo tell de nation that dem cost US$300 each.
De whole country now corrupt because of Jagdeo. Two days ago dem boys couldn’t stop laughing when dem hear a story about a policeman who use to guard Jagdeo.
One of ee colleagues loss ee phone. He ask everybody on de TSU drill square platform if dem see it but nobody ain’t see it.
De cop decide to ring de phone and it start to vibrate. Dem see a policeman pun de drill square restless and shaking. When dem watch dem see he crotch moving and dem know that it couldn’t be from any wutless talk.
On further examination was de missing phone vibrating in de man crotch. Dem boys hear when de ask him how de phone meet in ee crotch, he give de same answer wha Jagdeo does give, “Somebody put it deh and I don’t know is who.”
Jagdeo seh somebody did put up de Skeldon plant and he don’t know was who.
Talk half and see how Jagdeo gun defend de policeman.

Discover more from Kaieteur News

Subscribe to get the latest posts sent to your email.

Latest News