Dem boys seh Dem playing people like a guitar

Apr 08, 2017 Dem Boys Seh, News

Things got to be really bad when de opposition got to pick pun everything to mek a point. Gail complain how a reporter deliberately tell a lie pun she and de party. De truth is that when de reporter ask she when she gun present de list of dem people who dem collect to be de Chairman of de Elections Commission, she seh that this week she gun look at it and mek a decision.
If is one thing that people got to learn is that when people ask a question de thing that does stick in dem mind is de first words. So when Gail seh this week de poor reporter think she gun hand in she list this week.
Lo and behold she go and mek a song and dance.
Then SARU move in and seize some computer from Enmore. De noise Jagdeo and he party mek could deaf a deaf man. Dem claim how de people spiteful and all kind of thing. Is only when de truth come out that dem shut dem mouth. De people did plan to sell dem computer to a man who want set up an Internet Café.
As soon as de truth come out de party switch. All of a sudden de computers had cobweb and dem wasn’t wukking. If dem ain’t wukking why de party had to mek all de fuss?
Dem boys must admit that de party know how to mek noise. Jagdeo go round and tell dem businessmen that dem must hold on to dem foreign currency fuh spite de government. He got to know wha he starting because de government can tell its people not to buy from certain stores. That happen one Christmas and all dem same people who listening to Jagdeo holler.
De same Jagdeo who never go in de market to buy one squash now deh in all dem market. He suddenly got a soft spot fuh de vendors and de poor people falling fuh de trickery.
Dem boys know wha deh behind all this and is only a matter of time before de bubble buss.
Talk half and watch how Jagdeo playing he own people.

Discover more from Kaieteur News

Subscribe to get the latest posts sent to your email.

Latest News