Soulja Bai paying fuh de Marriott

Mar 29, 2017 Dem Boys Seh, Features / Columnists, News

Jagdeo got a press conference today. Last week he hold two and de week before he had three. In he whole life as president he never hold one press conference a month.
As a matter of fact, when ee get ketch doing skullduggery ee does run and hide. Dem boys know why he holding so much press conference and know how he love de publicity and being in de limelight when de people ignore him it does bother him.
And wuss yet he don’t like dem boys because dem always skin him up, tek off all he clothes and hang he de Jagdeo to dry fuh de whole world to see.
Today he holding de press conference to cuss down bout de two new young lady wha Soulja Bai swear in. Dem boys hear he vex bad. He fuming.
He wanted Carl and Bull S. Rai to remain fuh life in de two chair wha dem ladies now get de same way how he Jagdeo want to be president fuh life. He believe that he and a few people alone own Guyana and dem is de rightful and best leaders fuh de country.
He was de one who lead Guyana into this Marriott scam in which he and Babbie got Soulja Bai paying $220 million every year for de hotel. To this day nobody don’t know who is de private people behind de scene in de Marriott.
He got to talk bout de Marriott at ee press conference.
He talk how from de time de Marriott open its doors it was to start mekking a profit. It open its door more than two years now and Guyana got to pay de loan and if Soulja Bai don’t look out he might have to pay Jagdeo too.
Soulja Bai don’t know bout de special rooms wha Brassington build in de hotel. Dem boys hear how big party use to go on there. Friends and family use to come from overseas and dine there fuh free; all at de expense of de grave diggers and cane cutters of Guyana.
Dem boys never know that Brassington, de fat crook, use to shut down he wine bar and carry ee family to de Marriott fuh freeness. Is yesterday dem boy meet one of Jagdeo and Brassington padnah who let out all dis secret.

Discover more from Kaieteur News

Subscribe to get the latest posts sent to your email.

Latest News