Jagdeo getting blame fuh terror in Britain

Mar 23, 2017 Dem Boys Seh, Features / Columnists, News

Old people always got a saying that when a dog got a bad name it does get blame fuh everything. Jagdeo has to be a dog wid a bad name because he get blame fuh de terror attack in London yesterday.
A man jump in a car and decide to drive over couple people before he go to de equivalent of Public Buildings. He jump out de car and jook up a policeman and kill him. He ain’t satisfy; he decide to go inside de Parliament. He get shoot but by then five people done dead.
When de news reach Guyana dem boys seh somebody tell dem that is Jagdeo send de man because he still vex. A British expert, Sittlington, did come to Guyana and mek Jagdeo get arrest. Jagdeo didn’t mind if de rest of he people did get arrest. He claim that he untouchable because he got immunity.
Anyhow, Sittlington mek SOCU arrest him and he get vex. Now dem boys seh that he had to get even wid de British government and Sittlington that he send a bad man.
Dem Chinese people who wuk pun de Marriott start trying to get even wid Jagdeo. Dem start to squat because dem claim how Jagdeo and Brassington owe dem. Soulja Bai get in de mix and now dem same people vex wid him, so vex that more people now squatting.
It start off wid fifteen people who claim that Brassington and Jagdeo owe dem US$5 million. Soulja Bai tek over and he tell de squatters that he gun do an audit to see exactly how much who owe who. Dem boys seh that de next thing dem hear is that de audit show that de Chinese people owe de Marriott US$180,000.
Is start de madness start because de contractor done gone so he don’t have no money to pay back. Dem boys seh no Guyanese can go to China and squat pun any land. If any of dem was wukking pun de Olympic stadium and dem didn’t get pay dem couldn’t dream fuh live in de stadium. But Guyana is Guyana and de government should lock dem up. Dem can’t come here and encourage eyepass.
Talk half and wait to see if de British gun question Jagdeo.

Discover more from Kaieteur News

Subscribe to get the latest posts sent to your email.

Latest News