People got eyes but dem not seeing

Jan 28, 2017 Dem Boys Seh, Features / Columnists, News

Jagdeo was always a wicked man but is now dem boys know how wicked he really is. From de time de dog doctor announce that he calling it a day, Jagdeo call quick time fuh Soulja Bai to get ready to accept de names.
Jimmy Carter did come a long time ago and he wuk out a system because de old system allow whoever in power to win de elections. It mek people vote till dem finger sore but dem never see de vote. That is how Jimmy Carter come and lef this system.
Dem boys mek a constitution that seh that de best person should be a judge. But it also allow fuh a person who de president could like. Jagdeo know this and he put up a list wid people who he know gun get Soulja Bai vex.
He also know that if Soulja Bai get vex he can’t throw out one name; he got to throw out de whole list. That is why Jagdeo was smiling when he send de first list. He mek Soulja Bai so vex that de man tek it pun himself to look for a retired judge. Now Jagdeo vex because Soulja Bai outsmart him.
But de same plan can backfire because Jagdeo can recommend de Chancellor when de man retire. In fact, dem boys seh that Carlee would be de best bet.
Moses done seh that Soulja Bai right and that Jagdeo can go to de CCJ except that de CCJ wouldn’t see him. In fact, nuff people don’t see nuff things. De parking meter people didn’t see problems wid dem teacher. All dem see was money. A parent go to pick up a child got to park and pay; a minibus stop to pick up school children got to stop and pay. Teachers go to school fuh de day and dem got to park and pay.
Since de teachers win, de police got plans. Dem promise to knock all dem parking meter that deh close to de four-corner. Just like how Jagdeo didn’t see de kind of objection to he list, is de same way de parking meter people didn’t see de problems coming.
A lady get rob yesterday because she didn’t see de bandits trailing she.
Talk half and keep you eyes open.

Discover more from Kaieteur News

Subscribe to get the latest posts sent to your email.

Latest News