Chat-3 and ee friends seeing jumbie

Dec 14, 2016 Dem Boys Seh, Features / Columnists, News

Old people always talk a story bout de boy who cry wolf. He carry out ee sheep and then he start to fool people. He holler how de wolf coming fuh attack ee sheep and when de people run out he throw down heself and laugh.
De day when de wolf come and de boy holler, nobody ain’t come out and de wolf had a field day wid ee sheep.
Of late, is everything de government do getting criticize. If de government talk too hard it shouting at people and it arrogant. Since it miss is trouble. De other day Jagdeo remind Soulja Bai that de party did not fulfill de election promise. That did happen when de coalition fail to lower de VAT. When it lower de VAT is another story. Now dem boys hearing how de coalition punishing and torturing poor people.
Dem boys was in parliament when de Speaker tell Dr Nutten to go and open de bond suh de Opposition can see wha deh inside. De news spread and some reporters decide to go to de bond too.
Dem boys see when two Pee Pee Pee MPs tun up. Dem see de reporters, a Minister, and dem see de lawyer. When dem count was only a handful of people and one of dem was a pregnant reporter. De next day de Chat-3 put out three photo pun ee Facebook page. He write how is a mob at de bond.
Since when two reporter from de Waterfalls paper, one from de Big Market paper, one from de other newspaper, a lawyer and two residents is a mob? It had to be jumbie.
If dem did tek de photo and shut dem mouth even dem own supporters wouldn’t get vex, but now de people see that Jagdeo got all of dem clutching everything. And wha mek dem boys get vex is that Irfaat and Two Edghill been out there, but de person who tek out de photo mek sure that he didn’t show dem talking to de same people who de Chat-3 calling a mob.
When de party go to Essequibo over de weekend, de message is that dem confront a mob. Dem boys promise to print de mob photo.
Talk half and watch how people does mek up things.

Photo in Saturday as chat-3 mob

Discover more from Kaieteur News

Subscribe to get the latest posts sent to your email.

Latest News