Latest update May 22nd, 2026 12:38 AM
Dem boys seh…Name one good thing Jagdeo do fuh Guyana
Dem boys get a call from a big man saying, “Please lef Jagdeo alone. He do a lot fuh Guyana and he deserve a place in history.” Dem boys laugh…hard.
Right away dem boys remember that two months ago, Ah Kneel call too and he seh that every day dem boys talking bout Jagdeo. He seh, “Why y’all don’t lef de man alone. He do so much fuh Guyana.”
Well dem boys nerve bump raise when dem hear Ah Kneel seh he, Jagdeo, do so much fuh Guyana. De first question to Ah Kneel was fuh he name just one thing that Jagdeo did in de twelve years he sit as president of Guyana, that he and de people could be proud of.
Dem boys had to remind Ah Kneel dem not talking about de friends and family and cronies that he, Jagdeo, enrich. Dem ain’t talking about going about de place begging and getting debt write-offs. Anybody can do that.
A junkie does wait till de boss man fuh de Waterfalls paper drive up and he does busy wid he broom. He sweeping de pavement. As soon as de boss man jump out de vehicle he does approach de boss man and seh, “You see how nice and clean this place look? Is me got it suh. You got to give me something.”
That is how Jagdeo use to beg dem foreign people and get something. That isn’t nutten hard. If a junkie can do that, wha do Jagdeo?
But back to Ah Kneel. When dem boys ask he fuh name one thing that Jagdeo do, he stutter then he pause and seh “Ah can’t think now. I deh wid some friends drinking.”
To this day, dem boys still waiting fuh he and de caller fuh name de one thing. Dem boys also challenge de entire Guyana, more so all dem Ministers that wuk under Jagdeo, fuh tell de nation one thing that Jagdeo do fuh mek people proud.
Jagdeo free to call or send a letter fuh seh one thing that he proud of. But he must not talk about de Bees and dem scamps and dem crooks that he surround heself wid.
And while he thinking about wha he do, he must also think about de former Prime Minister of Israel who yesterday get sentence to six years in jail fuh corruption.
Jagdeo should thank God he don’t live in Israel, but dem boys seh dem would like to try him here fuh corruption.
Talk half and we waiting for de answers from de caller, Ah Kneel, Jagdeo and Donald if he want push ee mouth inside de story.
Share this:
Discover more from Kaieteur News
Subscribe to get the latest posts sent to your email.