Dem boys seh...Donald throwing ee hammer pun Jagdeo creation

Dem boys seh…Donald throwing ee hammer pun Jagdeo creation

Apr 25, 2014 Dem Boys Seh, Features / Columnists, News

Donald open he mouth at de police conference and people realize that he serious bout stamping out corruption.
Dem boys know that corruption tek over Guyana ever since Jagdeo was President. De thing start wid dem kantractah who use to build schools, bridges, wells, sluice and water pump station.
Dem seh that dem spend hundreds of millions when de wuk nah even show hundreds of thousands. Dem inflate de prices on each project by 100 times to full dem pocket, dem mooma pocket, and dem friends and family underwear.
Dem even build airstrips fuh crappo exercise and bush motobike run pun. And dem didn’t build dem properly. Dem mek dem suh bad that cow refuse to go pun dem and dog refuse to pee pun dem.
Donald know from day one and he use to talk bout it. When dem reportah ask, he use to seh that de party gun deal wid all dem corrupt people in de party.
De truth was that he couldn’t do nutten because he wasn’t de boss. Jagdeo was de boss and nevah do nutten. As a matter of fact, he encourage corruption. He hug and embrace it as if he love dem
More than he muddah. Ask Lie Nel and Rob de Earth.
When de corruption doo doo hit de fan, Guyana nearly faint wid de smell. It was coming from Ohh Pee under Jagdeo leadership. People start talk and fuh tek shame out he eye, although he nah got none, he tell Luncheon fuh bring in lie detector. He order that dem li’l pickney like clerk, police constable and dem young Custom officer fuh tek it.
He refuse fuh he and he people fuh tek de test first and lead by example.
Some of dem big ones and not so big ones did refuse. Dem was allowed to go scot free because dem had nuff secret fuh de then.
Luncheon seh that he sick and ee deh pun he last days. He promise not to tell any more untruth. He got secret fuh Jagdeo which he seh he do not intend to full he grave wid.
Now Donald do de test thing from reverse. He seh that he gun start from de top wid de big boys dem, in and out de police force. He seh that dem must tek de test before dem get promote. He prepare to lead by example.
Jagdeo never go and will never go near a lie detector. He does still call and find out wheh de machine deh just not to pass close. And dem boys ain’t got to tell you de reason why.
Dem boys seh dem now know that Donald wake up from he coma. De taxpayers gun get value fuh money and jobs will be done without a bribe from de top to de bottom. People got to stop tekking bribe and demanding bribe.
Talk half and go Donald, Go. De nation behind you.