Dem boys seh... Junkies gone to Supenaam stelling

Dem boys seh… Junkies gone to Supenaam stelling

Apr 19, 2011 Dem Boys Seh, Features / Columnists, News

De Supenaam stelling fail again. Dem boys seh that it failing every week and every time it fail is money. De government already spend more than $500 million pun it.
This stelling build fuh wuk when tide high or when it low. Up come a high tide and de pontoon mek attempt to sail away and lef de stelling ramp. De gap mek dem boys remember de other one that sail away in de Charity River.
Dem boys want to know if this stelling build fuh wuk wid a special tide. When de tide high it bruck down. When de tide low de boat can’t moor.
Now Bharrat always talking bout value fuh money. If de Supenaam stelling is value fuh money then according to dem boys, de man ain’t got no value fuh money.
From de start dem was to do some investigation but dem run out of detectives.
Then dem claim how dem gun do over de wuk. Same thing. Dem couldn’t find engineer.
Dem boys seh is better dem did spend that same money and mek over de Adventure stelling.
Since de news spread that de stelling fail again dem boys see some scrap metal people and nuff junkie racing to de area. People from Kitty, Campbellville, and Albouystown head down there. Two of dem even come from Corentyne.
Last night Robeson put two watchman. Even Robeson go up to Supenaam wid a team fuh keep away de scrap metal dealers. De poor guards couldn’t sleep because every time dem blink dem hearing something like cutting torch. Dem wasn’t sure if is Robeson repairing or if is dem junkie gone to wuk.
De reporter who try fuh tek a photo couldn’t get a good one because of how de stelling shaking. De picture come out blurry, blurry.
Dem boys want to know wha gun happen wid de new swimming pool after it open; if is de same thing gun happen like wha happen at Supenaam. People might be swimming in blue water and de next thing it start tun brown because it leaking and de Atlantic seeping in.
Talk half. Lef half.