Latest update September 20th, 2026 10:40 AM
Dem boys seh….CLICO gun pay bonus
CLICO paying out money and people going to collect and end up cussing. It start wid dem who got life policy.
One woman collect less than one premium and she claim how CLICO shut down but it still thiefing. She claim how Bharrat tell dem that dem gun get back all de money dem pay.
It tun out that a life policy got certain surrender value and dem boys know that. Dem try fuh tell people that de policy is like a bet. De person who tek out de policy bet that he gun dead and de insurance people bet that he can’t dead. If de person dead de policy pay. If de person live is another story.
But dem boys notice that others who got savings can’t get dem money yet. Nuff people guh to collect and de people who sharing tell dem that nobody not ready fuh dem yet.
Dem boys thought that things was straighten out and was everybody was to collect, that all people had to do was line up but it look like dem have a plan.
De plan is to pay de big money like how dem does pay bonus, near holiday and near elections.
Bharrat smart. Dem boys seh that de money to pay in some bank earning interest suh by de time de payout done somebody gun mek a profit.
Now dem boys seh that de profit might start another CLICO and de whole cycle gun start again.
Talk half. Lef half.
Share this:
Discover more from Kaieteur News
Subscribe to get the latest posts sent to your email.