Latest update June 3rd, 2026 12:40 AM
Dem boys seh….Jackass getting hotel fuh sleep
Guyana either got people who like dream or dem want to impress others. Imagine that Manny talking bout building a hotel pun Wakenaam to boost local tourism.
When dem boys hear de news dem believe that de man seh that dem want to boost local terrorism.
GINA talk bout some programme dem had pun de island. Wakenaam got about 5,000 people. GINA report how 8,000 people attend.
Is alright. Dem boys seh that dem count de sheep and goat and jackass who been pun de island at de time.
People lef de place and some of dem can’t find people to stay in dem house. Wakenaam got nuff empty house but de government want to build hotel. Tourists coming. Dem coming to see de tallest garbage pile in de world and dem pavement in de city. When dem done dem gun go to Wakenaam to rest up.
Well fuh sure de hotel gun attract dem goat and sheep and jackass and even some of dem ass. It gun be a place of glory, a real tourist destination. People gun see goat and jackass sleeping in hotel.
Talk half. Lef half.
Share this:
Discover more from Kaieteur News
Subscribe to get the latest posts sent to your email.