Latest update April 24th, 2026 12:40 AM
Latest News
Dem boys seh…Uncle Freddie can really run
Uncle Freddie run like if he had de devil pun he tail. He run faster than Usain Bolt. And unless de police was de devil then he had a right to run because de police was after he fuh disturbing de peace.
Dem boys seh that dem didn’t know he had all that speed. But de Champion of de Earth gun ketch he. De Champ seh that he got to get Freddie lock up before he change he wuk, sooner rather than later.
De man wasn’t satisfied wid he wuk at UG and he column fuh de Waterfalls paper, he had to go to get some children to protest in de city.
He partner, Benschop, get lock up and Corbin had to fork out de money to bail he. Now dem boys seh that dem sure dem wouldn’t see Freddie pun de road in a while. And he shoulda been a revolutionary because freedom fighters got to tek lock up and even death.
Dem gold miners seh that dem is revolutionaries too. Dem want a piece of Amaila Falls because dem boys tell dem that nuff people get a piece of de falls already. Fip get he piece and some other people get dem piece. Even Sithe Global get a piece suh dem porkknockers decide is dem time. Dem want to put couple dredge in de Falls.
And dem boys tell dem that if dem who own de falls cant give dem a piece than dem have to give dem a contract. Fip own would do.
Talk half. Lef half.
Share this:
Discover more from Kaieteur News
Subscribe to get the latest posts sent to your email.