Dem boys seh...Is six (lashes) fuh Bharrat

Dem boys seh…Is six (lashes) fuh Bharrat

Dec 04, 2009 Dem Boys Seh, Features / Columnists, News

Dem boys remember when political meetings use to attract crowds because de speakers was good. People use to walk long distances because dem always want hear some people talk.
That is how Cheddi and Burnham use to pull crowd and that is how dem party get popular to this day that others ain’t got to do nutten and dem still getting vote.
Well dem boys seh that dem days gone. Imagine de contractors and some other friends of Bharrat start up a following. Is just like when Cheddi and Burnham use to attract a following.
When dem boys see de crowd de other day outside de Office of de President dem decide to ask some of de people why dem gather up outside de place. One man claim how he ain’t want Bharrat get a third term. Some people grumble.
That is when de man drop de bombshell. He seh that he want Bharrat get six term. Well dem boys seh that is time fuh people get worried. Three six is de mark of de devil; six o’clock bee mean that any clothes lef outside gun attract spirits; six lashes is de maximum bad children does get in school (dem boys does call it six of de best); and of course six minus one years is equal to one Jagdeo term.
Is six bottles does deh in a small case of Guinness and is six years thieves does get when dem get commit two crimes.
Yesterday, some people tun up outside Office of de President and stage a protest. Dem boys seh that was a great idea because every time somebody protest there, Bharrat does get de publicity.
Talk half lef half