Last week dem boys had to hold dem mouth when a man who was de Attorney general and who actually sell he soul to de government announce loud and clear that he gun sue de government fuh he money.
Old people seh that when blind man tell you that he gun pelt you he done got brick in he hand. When Doodnauth announce that he gun sue, he did done sue.
Well dem boys hear how de court start looking fuh a judge to hear de matter and while dem was still searching a retired judge announce that he and all now suing de government fuh he money.
De man tell dem boys that de government refuse to give he all he benefits because he rule against dem in two big cases.
Well dem boys seh that if dem boys who was die hard PPP people got to sue fuh dem benefits, what Uncle Adam got to do. He was a die hard PNC.
Dem boys seh that he start fuh cry when he hear that NCN tek he pension money and buy a set of gym equipment and put it outside de studio.
Nobody ain’t using it and it deh like a while elephant.
Fuzzy walk pun de mat one time and Martin sit down pun de bench one time.
Dem boys seh that is spite. Dem want to know wha de government gun buy wid Doodnauth and Jainarayan pension. Dem might buy a national stadium.
Talk half. Lef half.
Discover more from Kaieteur News
Subscribe to get the latest posts sent to your email.
