Is a question of who gun thief what

Aug 08, 2008 Dem Boys Seh, Features / Columnists

When people play mad dem does get de treatment, and sometimes dem don’t even live to tell de tale. Was a pity that a woman had to die, and de thing is that de hospital get skin-up. A mad person coulda kill a nurse and de hospital wouldn’t even know till day clean.

Well, dem boys seh that dem have some people who does play mad fuh see wha gun happen. Tek de case of de Hard Times newspaper.

Dem boys seh that de owners playing mad because dem want to see how far dem can push de law. Of course, de law seh that every newspaper got to register, but old people always seh who got luck eat pork.

According to dem boys, somebody got a problem wid who name fuh put de paper in. If dem put one name, and de man and de organisers fall out, then de man can easily thief de paper. For example, when de paper start, dem boys hear that Sucklall was de owner.

Well, that cause some confusion, because dem boys did already know bout Glenn Lall, suh dem want to know since when Glenn change he name to ‘Suck,’ or when he do something that mek he get that name.
Is when dem other boys insist that is a new kid on the block and that he was another Lall.

Anyhow, one man claim that if Sucklall get de paper, then wha gun happen down de road? Another man claim that dem can put a rubber stamp.

Who? One man seh Kwame. Dem ain’t try that, because Kwame is one ambitious fellow and he might actually sell de paper.

Right now, dem boys waiting to see wha gun happen, because dem know that if dem put de wrang man then people might holler thief from thief mek Gawd laugh.

That is why dem boys still laughing. Dem remember de days when Burnham get vex wid Matthew Allen, who use to play ‘I surrender all’ every morning at a quarter to seven.

Was de same time when Venezuela was claiming all de land in Essequibo. Burnham want to know how Matthew can surrender all when Dave Martins holler ‘Not a blade of grass’.

Dem boys seh that Burnham call Matthew and tell he that he got to play something else. Matthew play Abide wid Me de next day and Burnham get mad, more mad.

Burnham call he again. De next day Matthew play ‘Open de door leh de man come in’. Burnham beg he fuh play I surrender after that.

That song deh pun plenty people lips now. Nuff of dem who been to de PPP congress singing it. Robert singing it, because he come second to last in de top ten. Dem boys seh that he got to surrender because Dr Frank come third, and Moses, instead of coming forth, came fifth.

Is de laugh from de hall mek people know wha happen. Kwame ain’t get, in because people ain’t want he since he lef de TV programme, Square Talk. Ralphie fall down and Shirley barely squeeze in. Reepu deh, but he ain’t got no big ambitions.

That is why Robert vex, because dem boys seh that he think that he would get plenty vote and plant heself in line to be de next president. The shock mek de man deliver the shortest speech in he career yesterday.

But that ain’t de whole story. De man even forget to wish Sharma a happy 60th birthday and welcome he back to TV land. Even Glenn, de Waterfalls boss man, also get de same shock when he hear that he got to pay taxes while some ain’t got that option.

He get vex and he talk to some people, who talk to other people, and de news get around. De next thing he ears ringing.

It still ringing. Dem boys seh that it ring so much that he ain’t even hear when Sharma invite he to play Julius Caesar at de birthday. Even when he sleeping he ears does ring. That is what dem boys seh.

De same Waterfalls boss man decide that he gun have to leave de country if this ringing thing continue. He want to go in space. And if you hear why. He want to spill he guts over a certain property.
Talk half. Lef half.

Discover more from Kaieteur News

Subscribe to get the latest posts sent to your email.

Latest News