Old people getting disrespect!

Oct 11, 2025 Dem Boys Seh, Features / Columnists

(Kaieteur News) – Once upon a time in Guyana, when yuh see an old lady struggling to cross the road, every driver use to stop. Some even come out the car and help hold she hand. Nowadays, if she limping across with she lil stick, dem drivers blowing horn like she blocking traffic.

Dem boys seh people losing all sense of decency. Yuh can’t even get a “tek yuh time, Granny” anymore — only “move yuh foot man, I late!”

Dem boys seh the old folks catching hell. Some of dem children does carry dem to the hospital like how yuh carry old clothes to charity. “We gon check back later,” they does say. But “later” never come. Granny deh pun the hospital bed thirsty and nobody bringing she even a lil bottle of water. And when the doctors discharge she, dem same children does vanish faster than pension money on payday.

When the old folks dead, the story get worse. Nobody claiming de body. Dem family does suddenly develop amnesia. “We never hear she had any children,” dem does say, while the poor soul lying cold waiting for a stranger to decide where she must rest.

Dem boys hear a story last week. One old man jump in a minibus and tell the conductor, “Son, I short twenty dollars on the fare.”

The conductor buss out, “You think is pension bus dis?”

The old man look at he cool-cool and seh, “No, bai. But if you live long enough, one day you gon wish it was.”

The conductor quiet whole trip after that.

Every young person believing they gon stay young forever. But time does sneak up like GPL blackout — sudden and without apology. Respect the old, because if you lucky, one day you gon be one.

Dem boys seh… the way tings going, if karma driving, half of we gon end up walking home.

Talk half. Leff half.

Discover more from Kaieteur News

Subscribe to get the latest posts sent to your email.

Dem Boys Seh, disrespect, Old people

Latest News