Dem politician getting ‘bassadee’

Jan 21, 2022 Dem Boys Seh, Features / Columnists

Dem Boys Seh…

Kaieteur News – We gat a word we does use for when people getting so jittery or nervous dat dem does can’t think straight. We does seh how dem get ‘bassadee.’
Well Glenn Lall gat de guvament and de Opposition bassadee. De man tek a brave stand fuh expose de rotten deal wah we get from dem oil companies.
And is de guvament getting de jitters every time Glenn Lall open he big mouth. In fact some ah dem politican frighten fuh open dem mouth because dem know when dem talk stupidness, he gan expose dem. So nuff ah dem wah use to like talk, suddenly get dumb.
Nuff pressure coming down pun de Waterfall newspaper. But yuh can’t keep a good man down. All de man asking fuh is a better deal fuh de people of Guyana. De man nah looking fuh nuttin fuh heself. He know dat if we sit back and accept this rotten deal, by de time we teeth ready fuh fallout, we still gan be poor.
All de wealth dis country gat – gold, diamond, timber bauxite, fish and now oil – and still we gat people ketchin hell in dis country fuh survive. Every day we hearing bout some new company coming to Guyana. And dem getting nuff concessions and plenty ah dem fetching out we wealth and paying next-to-nothing in taxes.
And when de boss man of de Waterfall paper protest, dem political leaders vex and dem getting bassadee.
Talk half. Leff half.

Discover more from Kaieteur News

Subscribe to get the latest posts sent to your email.

Latest News