Showing cause or tallying to de cause?

Jun 06, 2021 Dem Boys Seh, Features / Columnists

Dem Boys Seh…

Kaieteur News – Dem boys seh how de Prezzie young and he gan mek mistakes. He is still youthful and he trying to do de best and to de best of he abilities. So he gan mek one and two mistakes but what is important for any person is dat dem learn from dem mistakes.
But he mek a beef stake rather dan a mistake yesterday. Deh gat certain things which as a statesman, yuh don’t do. It does mek yuh look bad in public.
Yesterday was World Environment Day and de Prezzie issue a Statement for de day. But de person wah write dah statement clearly nah understand dat when a President issue a message on behalf of de nation, is on behalf of every Guyanese.
And therefore, it should not mek reference to any political party. De Prezzie statement yesterday brag about what previous PPP/C governments do. Dat is inappropriate language for a message dat going international. Is a pity Daphne Rogers and Vic Persaud nah around fuh teach lil protocol.
De use of inappropriate language however is a bug which spreading throughout de government. Last month, de Department of de Environment (dem boys bin think this place close down) issue a statement in which it attempted to upbraid de parliamentary Opposition, the APNU+AFC.
It talk about how de APNU+AFC gat no regard fuh de truth and engaged in an attempt to deceive. Den it went on a political rant itemising de lists of failures, which de Coalition committed in relation to de environment. Reading dat, yuh woulda think dat de Department of de Environment deh pon de political platform or is an extension of Freedumb House.
Dat is not de role of a government department. Dem type of statements have to be issued in de name of a Minister or political figure not by public service workers. Dem government department can provide de information but dem nat supposed to get entangle in partisan attacks.
Dat is grounds for dismissal. Dat is cause for de Prime Minister to ask whoever issue dat statement to show cause why he or she should not be disciplined.
Talk half and nah hold yuh breath for Uncle Mark fuh do so!

Discover more from Kaieteur News

Subscribe to get the latest posts sent to your email.

Latest News