Latest update September 28th, 2026 10:20 AM
PNC+KFC promises run away and lef dem
When you li’l, you does mek promise wha you can’t keep but people does forgive you. However, when you get big and you mek dem same promise wha you don’t keep, people does put a curse pon you.
But when you is a politician and you mek promise wha you don’t keep, people does seh you is a thief, a scamp and even a prostitute.
De coalition mek nuff promise to de Guyanese people before de election. Dem seh in de first hundred days when you see Guyana you wouldn’t recognize it. You would think you in Japan or in Paris.
De first thing dem seh dem would jail Jagdeo and his crew. 1300 days later, not one politician get jail. Instead, dem send a few junkie fuh smoking grass.
Dem also seh dem would set up a special body fuh investigate corruption and all de thiefing wha went on.
1301 days later, not one thing ain’t happen; dem boys believe de commission deh in China or India or Africa, coming pon de back of a snail.
Dem seh de procurement system gon change fuh de better. 1302 days later, dem change de people but de system wha encouraging corruption still remain.
Anodda promise was to reduce de president’s pension. 1303 days pass and gone and dem president collecting more money than before.
Before de election in 2015, de way Jagdeo and he MPs was behaving de coalition promise to establish rules fuh Parliamentarians, Ministahs and all who hold high office to behave in a certain manner.
1304 days after de coalition in power, de situation is wuss. Dem refuse to declare dem asset to de Integrity Commission. Some of dem thief so much, dat dem can’t explain how dem get dem wealth. Some of dem start wid bicycle and driving high end vehicle.
Some did live in rent house; overnight dem got a mansion and four property to rent. No wonder dem can’t declare dem assets.
Dem fight wid police in parliament and mek de nation shame.
Tomorrow is 1305 days and all you gon hear is dis one blaming dat one and dat one blaming dis one. Is de blame game dem playing wid each other dat mek Soulja Bai get sick.
Talk half and remember is dem promises you vote for; not dem face.
Share this:
Discover more from Kaieteur News
Subscribe to get the latest posts sent to your email.
Similar Articles
Website Hits
Blunt of the day
Sports
Features/Columnists
Sir. Ronald Sanders
The GHK Lall Column
Weekend Cartoon
