Jagdeo nearly duck Felix cork

Jul 20, 2018 Dem Boys Seh, Features / Columnists, News

Jagdeo and Soulja Bai meet yesterday. Dem had to meet because if dem didn’t meet no policeman coulda get promotion. Wuss yet; all dem commissioner woulda been acting commissioner.
But dem boys want to know if de acting commissioner does get less pay than de real commissioner. One man seh de pay is de same because de acting allowance does mek it up. De problem does come when de person retire. De pension does be at de last confirmed position he hold. It gon be smaller than de real commissioner pension.
Anyhow, when dem meet, one man see Jagdeo going in State House and he cry. He seh it wasn’t fair fuh de man to get put out of he own house and then got to go back there to keep a meeting. De Chat-3 and Gail can’t understand because dem only use to go there fuh meetings.
Is strange how it does tek events to mek people hear all de nasty things about people. If you want hear bad things about a woman, go to she wedding and stand in a corner. Is de same thing wid de groom.
Another place is funeral. People does talk bad bout de living and de dead. If de dead had power, it woulda get up and slap some of dem who talking just like how Doctor Berry did promise to slap de woman from Red Thread.
Jagdeo talk how Paul Slowe got malice in he heart fuh nuff policemen and he might tek out spite and prevent dem from getting promote. Dem boys she, Slowe lef de force ten years ago. Dat got to be a lot of spite.
But is de story bout Winston Felix mek dem boys realize how spite does wuk. Jagdeo heself seh he didn’t know Felix was PNC, otherwise he woulda never mek Felix commissioner. Don’t mind Felix was de best of all de others who get test.
It just show dat when people talk bout political victimization is not joke dem mekking. Winston Felix ought to be glad dat Jagdeo didn’t have a spy inside de PNC. And is a good thing he, Felix, never parade heself although he use to walk foot to foot behind Dessy when he was Head of de Presidential Guards.
Talk half and watch how Felix get lucky.

Discover more from Kaieteur News

Subscribe to get the latest posts sent to your email.

Latest News