People pull ‘Wheels on Deals’ wid some bank

Jul 06, 2018 Dem Boys Seh, Features / Columnists, News

Guyana is a nice place. All you got to do is seh sorry when you do something wrong. But sometimes sorry don’t wuk. Dem boys was going home last night when two big man clash over food. De two of dem should a been living pun dem own years now. Instead, dem still living wid Ma.
One of dem eat out de buddy food and he didn’t get a chance to seh sorry. De licking wha he get, mek he dead. Dat is why people don’t mek joke wid food. Dem wuss than dogs.
But is only de poor people does end up in dis situation. De rich people does do odda thing. Dem full of crookishness. Dem boys now find out dat some people con de system and rob couple bank. Khurshid was in charge of de GRA when he people tie up a deal wid de bank.
De deal mean dat people does go to de bank fuh a loan and dem does use dem car as collateral. Dem get somebody inside GRA to get a registration fuh a high end car. If de car is mini minor dem does change de registration to seh is a Mercedes Benz.
Dem got no intention to pay back de loan, suh de next thing you know is de bank moving to seize de car. Nuff bank manager cry when dem send de seize man fuh de vehicle. One man even carry back a donkey cart.
To avoid de embarrassment, because is people money dem play wid, dem send home de people who do de scam and dem ain’t even mention de thing in dem annual report. Last night, two bank manager call dem boys and beg dem to keep dem mouth shut. Dem promise a small piece.
Is now dem boys understand why instead of de bank lending money pon a used car, dem buying de car.
Talk half and enjoy de Deal on Wheels instead of de Wheels pon de Deal.

Discover more from Kaieteur News

Subscribe to get the latest posts sent to your email.

Latest News