Jagdeo can’t threaten he party people

Jun 28, 2018 Dem Boys Seh, Features / Columnists

When dem boys was li’l children, dem mudda use to threaten dem whenever dem even look like if dem thinking about doing something wrang. And de threat use to wuk. All de mudda had to do was show a whip and it was peace and quiet.
Dem boys live to see de same thing happen when dem tun big man. Jagdeo had power in he hand even though he wasn’t president. He use to tell dem party members that if dem don’t behave demself he know how to deal wid dem.
That is why he get a man name Richardson to file de court case fuh mek he de Jagdeo go back as President. When he was president he had plenty power and it did feel good. He sit down de odda day and he see how nice State House look because Soulja Bai fix it up. He know that he should live in it again.
As president he had everybody tight. He tell dem that if dem don’t behave dem wouldn’t be Minister or get any fancy job. De people believe he gun be president again. But de CCJ spoil de show; it mek dem party members realize Jagdeo ain’t got a ghost of a chance to get power in he hands, again.
From de time that happen is like when dem boys realize that dem mudda can’t beat dem no more. People see Jagdeo as a paper tiger. Donald seh de CCJ ruling is a good thing fuh Guyana. And when Jagdeo seh he got a hand in who gun be de presidential candidate, a young man step up and seh to hell wid Jagdeo. He gun be de candidate.
But dem still got people who frighten Jagdeo. De Chjat-3 want to be presidential candidate but he frighten to show he hand. Irfaat frighten too. But dem boys believe that how Jagdeo ain’t got nutten to threaten people wid, dem same party people wouldn’t even look in he direction.
Talk half and watch how Jagdeo lose he stripe.

Discover more from Kaieteur News

Subscribe to get the latest posts sent to your email.

Latest News