Jagdeo got a face fuh every occasion

May 22, 2018 Dem Boys Seh, Features / Columnists

Jagdeo got a face fuh everything; one fuh funeral; one fuh jail; and one fuh Babbie.
Dem got a campaign on against jail fuh people who get ketch wid a li’l spliff of ganja.
Dem boys seh de leaders who pass that law and dem who keep it is a set of morons. De PNC pass de law under Hoyte. In dem days de fine was a lot of money.
Jagdeo come and meet it and when he was asked to change de law, he refuse. Today he singing another tune. He want de law change.
This is a man wid two face. Sometimes dem boys does see three.
He was de man who give away de oil blocks to Exxon, CGX, Hess and Pess fuh next to nutten. He didn’t think bout auction.
Now ee asking fuh put de few remaining oil blocks on auction. This is a case of locking de stable after de horse bolt.
Was de same thing wid de radio. When he was president he give away all de cable and radio frequencies to ee friends and family.
Today he talking bout auctioning de spectrum. He go a little further; he seh auction it in a two-tier setting suh he friends and family can get a foothold in de business.
He give way de bulk of de timber concession to BaiShanLin. Everybody know de govt had to tek way some of de land.
He also give de concessions to dem foreign gold company mekking a killing in this country.
Now he talking how de concession should match de production. Dem boys seh when he was in office de concession use to match his pockets. And dem boys believe his pockets was bigger than de production.
Today de whole of Guyana celebrate Independence. When he was president he use to tek de salute wid one face and when he reach home he had another one. Later in de night he had a face fuh Babbie, Brazzy, Ashni and couple others.
Nowadays de couple others got a face fuh Soulja Bai. Dem deh right up in de man face. Dem boys seh everywhere Soulja Bai tun he seeing one of Jagdeo face.
Today, on a celebratory dem boys seh, love all, trust few; everything’s real but not everything’s true.
Remember to keep an eye on de scamps and morons who leading de nation.
Talk half and Happy Independence Day to you all.

Discover more from Kaieteur News

Subscribe to get the latest posts sent to your email.

Latest News