Ministah seh de past don’t count

Dec 18, 2017 Dem Boys Seh, Features / Columnists, News

A man get convicted fuh a spate of armed robberies including bank robberies. In one of de robberies he kill a bank guard. He serve 20-odd years in jail. He come out last month and he apply to de Bank of Guyana for a job. He want wuk near de vault. Dat is what he put pun de application.
De shart baccoo give him a recommendation to carry to Gobind Ganga. In de recommendation he write and seh he know bout de man past but dat it irrelevant now.
Dat is de case he put forward fuh Guyana in support of Exxon, de oil giant. Dem boys want to know, “Is who interest he really looking after? De people of dis country, or Exxon?”
He tell de newspaper wha exposing all de wrongs wha de oil company do in odda country to back off and lef de people alone.
But when he was in de opposition he had a mouthful to talk about GoInvest boss, Keith Burrowes. Ee tell de man about due diligence (proppa background check) wid foreign companies. He seh dat was of utmost importance.
He seh suh wid he curl mouth and twang to de reporter. Dat is on record.
“There are certain foreign companies which seem to only have one motive, and that is to grab all that it can from Guyana’s soil. Our country is being exploited in several areas and government is not doing much to put controls in place to prevent this.
It is imperative that certain companies, be subjected to regular examinations.”
Those were his words straight from he mouth in August 2014.
He and ee kavakamites dem even cuss down BaiShanLin, Vitarna and dem odda foreign companies wha was eating up Guyana like spy ro jairo.
Dem cuss down Jagdeo, dat odda scamp, fuh not doing proppa due diligence pun dem foreign company. Today de shart baccoo singing another tune.
Dem boys believe he collecting money to be de mouthpiece fuh de oil company.
Soulja Bai got to decide whether dis man healthy fuh de nation when it come to foreign companies and kickbacks.
Talk half and check ee pocket, quietly.

Discover more from Kaieteur News

Subscribe to get the latest posts sent to your email.

Latest News