De Queen want Soulja Bai oil

Apr 28, 2017 Dem Boys Seh, Features / Columnists, News

Life is all about you self and some people don’t care wha dem got to do to get up or get on in life. When Soulja Bai lef to go to England he tell de nation he was going to do Guyana business.
When he meet England he get a message that de Queen want to see him. De whole world does want to see and meet wid de Queen except dem boys. Dem don’t care to see nobody because dem don’t plan to go nowhere.
Soulja Bai feel nice. If you see picture wha dem tek out. He tek out more picture than wha Obama tek out when he meet de Queen.
Wha he didn’t know was de Queen had she eye, not on him but on Guyana oilfields wha Quinn and others done eye up and waiting patiently to attack.
Everybody know that de ABC embassies and Jagdeo, that scamp, never get along. As a matter of fact, dem didn’t want to talk to him because dem realize he is a bigger scamp than dem.
Jagdeo been as president fuh 12 years and everybody know he was never invited to meet de British PM much less de Queen. And he wife was from England. Something got to be wrang.
And as soon as Soulja Bai tek office de Queen send to meet him. Dem boys seh is not because of ee good looks. Is because dem know dem can tek advantage pun him and rob de nation.
Dem boys waiting to see wha deal gun sign wid any British coming to invest in Guyana. Dem boys warning dem don’t think you gun come like that spirogyra BaiShanLin.
That company get nuff deal from Jagdeo and de Chat-3. Dem use to run and hide when de Waterfalls paper expose de concessions between dem and BaiShanLin. Soulja Bai use to cuss and behave bad and dem use to laugh.
Well de whole country laff yesterday when SOCU arrest de Chat-3 and drag him before de court in de prison van. He and Jagdeo get fun when dem put de Waterfalls boss man before de court. Dem laugh. De Chat-3 tell de Waterfalls boss man that if he win de case he, de Chat-3, gun appeal and keep de matter in court fuh years to come.
Yesterday de Waterfalls boss man laff till he nearly end in hospital.
Talk half and hope SOCU keep de Chat-3 in court fuh years to come.

Discover more from Kaieteur News

Subscribe to get the latest posts sent to your email.

Latest News