Trump and CN alike in nuff ways

Apr 07, 2017 Dem Boys Seh, Features / Columnists, News

Everybody in de world got a double. Dem have people who does always meet wid others who swear that dem two meet up before. When dem do check is somebody who look just like de other ones.
People get into trouble because dem was nowhere near a place wheh a crime commit but people swear how dem see dem. Is when dem ketch de real culprit and de police put dem together that people does see de difference.
Trump and CN alike. Both of dem rich; both of dem does do de things that does mek people cuss. Both of dem run fuh de presidency but de difference is that Trump tun president and CN never get close to even being a Member of Parliament.
De good thing is that Guyana not looking at CN these days but de whole world looking at Trump. De man sit down and shoot off some bomb pun Syria. Of course, some citizens in Syria dead and de world seh how Assad use gas—in short, chemical weapon.
Trump barely hear that on TV and he decide to bomb Syria. Dem boys want to know if he think he didn’t kill civilians.
De Americans got a name fuh people who got dem double. De word is doppelganger. Dem boys seh outside of CN Trump can’t have another person like him.
Dem got another person who got queer ways like Trump. Basil de Willie got a secretary who does tell people when dem go to de office and ask fuh Basil de Willie that dem must say, “De Hanarable Basil de Willie.”
One man tell dem how he never see Hanarable pun Basil birth certificate. That man can’t enter de compound to this day. And dem boys seh that even Soulja Bai get instruction to describe Basil de Willie as de Hanarable Basil. Don’t mind he behave dishanarable in front de judge de other day. But he don’t have a double.
Talk half and watch out fuh you own double.

Discover more from Kaieteur News

Subscribe to get the latest posts sent to your email.

Latest News