Soulja Bai clamp City Hall balls

Mar 22, 2017 Dem Boys Seh, Features / Columnists, News

Dem boys did warn Guyana bout dem four people who sleep wid dem hand outside dem window and cat jump it. De four was de Mare, de Town Clown, Clarky and long pocket Garrett.
When dem go to Mexico nobody in Guyana know till dem send photo posing pun de road in Mexico in front of something that look like a coffin but was a parking meter.
Dem boys believe that a small piece pass and dem come home very happy. Wha dem boys didn’t know was beside de small piece dem had a great time. Dem eat and drink a set of Tequila that mek dem sign a contract dem couldn’t even see.
When dem boys dig out de contract dem see de Mare sign as Hammy and de Town Clown sign as King Kong from King Street by de Cathedral.
De parking meter deal was beginning to smell like Jagdeo and that is why Soulja Bai seh scrap it. Soulja Bai did send Bulkan wid a soft message asking dem to suspend de deal because it was beginning to become a burden on de business community.
Dem boys hear de Mare cuss and jump pun a plane and go way after Soulja Bai announce de parking meter scrap. Dem boys ain’t certain wheh she gone but dem know she gone looking fuh de money to pay back.
As fuh de Town Clown, he end up at Public Hospital after he collapse after hearing Soulja Bai announcement. Nobody can find Clarky but dem see ee car by Sandy’s. He probably gone fuh cool down or sign de lastttt contract.
Garrett gone by Herman on Lombard Street to shorten ee pocket.
Talk fuh rain or talk fuh sun, de Mare seh she was promised another big job. She intend to tek control of GWI. After all, she and Bee Kay tun friend overnight and Dickie Van West vex.
Talk half and give Soulja Bai a pat on ee back fuh his stand on this, and not Sandra property.

Discover more from Kaieteur News

Subscribe to get the latest posts sent to your email.

Latest News