Latest update September 4th, 2026 10:24 AM
Dem boys seh…De forestry Minister playing de ostrich
Li’l children does play hide and seek; some does play dodge de ball. Dem big ones in de government does just hide. Dem boys find that out de other day when de Big Market paper tell de whole world how it can’t find de Minister who responsible for forestry.
De paper had some questions fuh he because some things wha he seh didn’t match wid wha dem forestry people seh. De paper go so far fuh seh wha de Minister seh, then it seh wha de forestry people seh. De two statements didn’t match.
De editor send e-mail, no answer. Then he send fax, still no answer. Of course de paper even try telephone call and get no answer. De Minister simply drop off de earth. Is a strange thing when a man got telephone and refuse to answer it. Even de prisoner on de jail who manage fuh get cell phone does answer de phone.
Dem boys seh that he wouldn’t answer de phone because he tie up heself wid Bai Shaan and if he open he mouth then everybody gun see how he really tie up, perhaps more than how people does tie up iguana.
But people can’t run and hide all de time because wid everybody searching somebody must spot dem. De ostrich does push he head in de sand and lef he behind expose because he believe that if he can’t see then nutten can see he. Fortunately, dem probably ain’t got homosexual male ostrich. And if is a female ostrich she got to be lucky that de male ostrich ain’t overtly amorous.
If de Minister think he is de ostrich then he gun get a rude awakening because something or somebody gun end up mekking use of de exposed behind.
Donald is another one. Dem boys disappointed in he. Wid all de evidence of corruption he still ain’t saying nutten.
Is like if he entire Cabinet is a pack of angels when de evidence suggest otherwise. Is time he mek he mark especially since he gun run again fuh de presidency.
Talk half and remind dem about de alphabet which seh ‘J’ fuh jail.
Share this:
Discover more from Kaieteur News
Subscribe to get the latest posts sent to your email.