Dem boys seh...Guyana fed up wid old song

Dem boys seh…Guyana fed up wid old song

Apr 22, 2014 Dem Boys Seh, Features / Columnists, News

All de project initiated under Jagdeo got only one tune. That tune is that this year gun be better than last year. But is only one set of people does benefit. Every year is a better year fuh dem.
Tek GuySuCo, fuh de past ten years this sugar company was suppose to produce so much sugar that by now de whole region woulda full. De Atlantic Ocean woulda taste sweet instead of salty.
This year dem sing de same song wha dem does always sing. De management project that de first crop gun be 74,000 ton. Dem boys seh that dem name should change from Bim and Bam to singers and projectahs.
When people question de US$200 million wha Jagdeo seh he spend, he jump up like a kangalang and seh that he gun personally go down and get de plant up and running. Is either that he run away or de plant run away.
Rob de Earth was a Minister at de time when de Skeldon factory build. He and all seh that he gun pee-nah-lies dem Chinee. He talk bout some US$5 million. Dem Chinee pay but is who collect and wheh de money deh.
When dem start de airport project dem sing how much Guyanese gun get wuk. Today, one old bad word deh guarding a sand pit.
Marriott was de same thing except that dem sing li’l more lang. Dem sing how nuff Guyanese gun get wuk. Hotel done build and Guyanese still nah get wuk.
Dem sing how dem gun tell de nation who putting in li’l bit money and end up owning de hotel. Dem boys got an idea; is one of Bobby children but he under age suh dem don’t want name he yet.
De hotel really build fuh Jagdeo and he did want give he niece from Miami some shares, de same way how he give she shares in de telecoms business.
Dem really sing bout de Amaila Falls project. De falls dry up but dem still a sing how dem gun start up this year. That song gun guh pun de hit parade.
De people of Guyana deh same way but de drug budget increase every year. Dem sing a special song how dem would stop give Bobby all de drug contract. That song nah got end. Every day dem boy hearing something bout that song.
De other day de guard seh how thief man stick he up and dem thief all de morphine. Dem boys know is who because de hospital got to replace. And all Guyana know who does sell de drug.
Talk half and let dem find new songs to sing.