Latest update May 5th, 2026 12:03 AM
Dem boys seh…GPL running outa excuse
When dog accustom to suck egg it can’t change. GPL accustom to giving people blackout at this time of de year and now, regardless how good things good, people got to get blackout. De thing wha get dem boys vex was that de same GPL had de nerve to announce that people gun get full current during de holidays and then hand people blackout three and four times a day.
Of course, de company find excuse. It claim how breeze blow plenty and it blowout de current. When dem get another long blackout, de power company claim how too much rain fall and de next thing dem know was that couple transformer blow and some post fall down. De only thing is that nobody aint hear no explosion and dem ain’t see no post fall nowhere.
De other day dem had neither rain nor breeze yet dem had blackout. De power people ain’t find no excuse. Long time dem use to blame rat and cockroach.
In de old days dem use to blame fuel shortage. Dem also use to blame de machine. Dem boys seh that one day dem gun run out of excuse; just like how some business people running out of excuse.
Imagine dem use to blame de bank suh dem keep dem money under dem bed. De excuse was that de bank can collapse like Globe Trust and dem would lose dem money. But things change suh dem, had de excuse that de banks got so much money that dem got to pay de bank to keep dem money.
One man claim that if he put he money in de bank he got to pay taxes. Bandits thiefing dem money by de millions. Tek Kirpalani. If he had to pay tax he woulda pay less than he try fuh send to de bank in a carton box.
But is Christmas and this is a time of sharing. Dem boys seh that perhaps Kirpalani was sharing de wealth wid de bandits.
Talk half and hope that somebody share wid dem boys.
Share this:
Discover more from Kaieteur News
Subscribe to get the latest posts sent to your email.