Dem boys seh...Some people planning dem exhibition

Dem boys seh…Some people planning dem exhibition

Mar 09, 2013 Dem Boys Seh, Features / Columnists, News

De whole of Venezuela cry on Friday. In fact, dem been crying since Tuesday when Hugo Chavez dead. He was de man who give poor people a chance to become somebody.
Now when people dead, is customary fuh either put dem underground or bun dem. De Russians keep dem leader to this day. Dem got he lie down in a place wheh people can still watch he and this man dead nearly ninety years ago. Of course de same people ain’t sure when he born. All dem sure about is that he born in April 1870.
Burnham dead just under thirty years ago but he create a record. He was de man who dead, get a funeral service, go away and one year later come back fuh another funeral service. De plan was to treat he like Lenin but de body nearly spoil suh dem put he away fuh good.
Now Venezuela decide that dem gun keep Chavez like Lenin suh that people can see hundreds of years from now. At de rate dem going de world gun end and Chavez gun still be on display.
Bharrat planning de same thing but dem boys telling he not to try that. Some people would thief de body fuh wuk obeah and everybody know that Jagdeo gun be bad obeah. However, he got a long time to live. Nuff of dem boys gun be dead and gone before he time come.
Is that same length of time it gun tek fuh Berry Berry tell dem boys how much de drug warehouse cost. He did seh that it cost couple hundred million dollar but when dem open de place he can’t remember. All he know is that de final cost gun be more. He seh that Brazzy is de tally clerk.
That is how de money does end up in people pocket—vote fuh one set and go back to parliament fuh de pocket piece.
But dem do one thing. Dem bring Bishop One Edgy Hill fuh bless de place. Dem boys seh is a place of calling pun de Creator fuh forgive dem fuh all de wrang thing dem do and fuh mek it right.
Talk half and pray fuh Berry Berry and de bishop.