Dem boys seh.....Bartica woman use Bharrat bag boy

Dem boys seh…..Bartica woman use Bharrat bag boy

Apr 05, 2010 Dem Boys Seh, Features / Columnists, News

Women tekking on anything and anybody. Dem proving that dem equal to any man and dem also got skills to show. De Rupununi Rodeo kicking up wid wild bull riding and wild horse riding. Dem man decide that dem gun handle de wild bull.

Dem try but dem didn’t allow dem woman to try because dem seh that it too dangerous. If you fall off de bull de animal does charge after you fuh butt you dead. Dem woman did vex suh dem wait till de horse riding come around.

One man see a sweet woman going pun de wild horse and he run fuh beg she. He tell she he gun marry she if she don’t put sheself at risk. De woman tell he that is risk she got to tek because she married and de man boring more than a late night church service.

Some of dem do better than some man because when one of dem ask Mannie to try he ask dem if dem mad, how he is a Minister and Minister don’t ride anything wild, not even human beings. Dem boys seh that he life got to be boring too.

De Regatta is another thing. People does go to Bartica fuh a good time and some of dem politicians does try fuh get a good time. Dem have one who does follow Bharrat around de place suh woman can notice he. He go to Bartica and indeed dem woman notice he and ask if is not de same man who always in trouble wid woman.

Dem decide to go around he and dem mek he spend. When de sport over and he looking fuh dem he suddenly find that dem gone. He cussing and he promise to ask de police to help he find dem.

Dem boys seh that dem now see why some people gun remain stupid till dem dead.

Talk half. Lef half.