Don’t thief, govt. hates competition

Jul 10, 2009 Dem Boys Seh, Features / Columnists

It is written in all the religious books that people should not thief. In de Koran, when people thief dem does get dem hand cut off. If you right-handed dem does cut off de left hand. If you left-handed dem does cut off you right hand.
Well in Guyana dem would have plenty one-hand people and nuff of dem woulda been holding high office. Right away, dem boys seh that dem see a quote de other day that read: Don’t thief. Government hates competition.
Now dem boys seh that all de people in de government clean like a whistle. Dem got to declare dem assets every year and dem assets ain’t even growing. But dem boys still hearing that dem have people who does claim how dem does pay bribe to big ones.
Dem had Customs officers who always use to stretch out dem hand till nuff of dem lef walking wid dem hand stick out. Then dem boys see some really big ones wid dem hand stick out too and dem know wha happen but dem can’t talk. If dem talk is either jail or dem loss dem wuk.
How dem Minister get big house pun dem small salary which Ramsammy seh suh small that he lef poor? By de time dem come out of government dem would have castle like dem people in England. That is wha dem boys seh.
Dem house can hold ‘bout twenty people but is only two and three people living inside. Why such a big house? Well one man claim how is he investment and when he ready to sell he gun mek a fortune. But dem boys want to know is which bank give he a mortgage to build such a big house when de mortgage ceiling is a certain level.
And if Leslie claim how de wuk don’t pay how come dem paying back this mortgage? Is hard, hard question that even dem ‘A’ Level students can’t answer, according to dem boys.
De other day dem man in Congress Place claim how he got to investigate de sale of de government twenty per cent in GT&T. It got to be that he suspect something. Whether he think is bluff is another story because de shares bringing in money. Now at one time de government had de whole thing and it decide to sell out most of it. It sell 80 and keep 20. Was one big story when de government change.
Cheddi decide to investigate de whole sale and when he find out wha he find out he couldn’t do nutten because he hear that de sale was genuine. But things tek a twist. De government want sell out de twenty and de man in Congress Place want to investigate.
Is big story. Dem boys seh that it woulda be a good thing if de government did keep de 20 because it still mekking money but Prak seh that is just like selling a car. You sell de car while it still driving. Well dem boys want to know if GT&T gun stall.
De other day somebody cut de cable that GT&T does use. This cable deh till in de area wheh people does call backdam but it still get cut and was no ordinary cut. Somebody hook it up to a tractor and dem play pull fuh buss.
Right away dem boys suspect something but dem couldn’t seh nutten because dem didn’t have proof.
But de government ain’t lose money suh it still mekking money. And that is why dem boys want to know why it selling out de shares.
Of course it gun get a lump sum suh that if de GT&T fail it gun get out it money just like how some big one get out he money from Clico before it fail.
But de more money people get is de more dem does open dem hand. Dem boys see people get money till dem couldn’t even guess how much dem have and yet dem stretching fuh more.
Any human being that acquires wealth and piles it up has lost the value of life. That is wha dem boys seh.
One newspaper grabbing fuh money till it sell out it whole back page. Dem boys seh that if was a man de do that, dem know that he sell he behind. But a newspaper ain’t a man suh dem boys wonder is wha else de owner dem wouldn’t sell. Of course people talk and de newspaper never do it again although dem boys seh that once a dog custom to suck egg it can’t stop.
Talk half. Lef half.

Discover more from Kaieteur News

Subscribe to get the latest posts sent to your email.

Latest News