Consultations floating away

Nov 14, 2025 Dem Boys Seh, Features / Columnists

(Kaieteur News) – Dem boys seh government got real timing. Yuh ever see anything so funny? Dem holding big consultation pon drainage in de city, and outside de place look like Venice after lil’ drizzle. Dem talking ‘bout concrete drains while de current drains busy drowning out de discussion.

One man seh de meeting shoulda hold outside, so dem could see first-hand how bad tings deh. But dem mighta need life jackets and paddle. Imagine de government consulting bout drainage while de drains consulting wid de clouds ‘bout how to overflow faster.

Dem boys seh before yuh go putting concrete, try find de drains first. Some of dem so choked up, even de rats pack up and move to higher ground. Is plastic, old slippers, election posters and empty talk blocking dem up.

Every time lil’ rain fall, city tun river. Next time yuh see people pun Regent Street, dem might not be’t shopping but ferrying groceries in boat. If yuh see how de water rise fast-fast, yuh gon think Noah building de next ark on Main Street.

But de big brains inside de air-conditioned room got plenty theory. Dem seh “modern engineering,” “climate resilience,” and “urban flood mitigation.” Dem boys seh all ah dat sound nice, but how ‘bout fetching one spade and cleaning a drain? Yuh can’t talk water away, bai!

Couple more showers and dem gon got to rename Georgetown — Georgesea. Yuh better start investing in outboard motors and rubber boots. Soon dem consultations gon be held pun float or Zoom, whichever stay dry longer. Dem boys seh consultation good, but common sense better. Before yuh go paving drains and canals, try clearing dem. Else, next big meeting gon be under water, and de only ting flowing right now is de nonsense.

Talk half. Leff half.

Discover more from Kaieteur News

Subscribe to get the latest posts sent to your email.

Consultations, Dem Boys Seh, discussion, drainage

Latest News