Latest update June 13th, 2026 12:40 AM
Wha really is a road block?”
(Kaieteur News) – Dem boys seh long ago, de police use to tell we plain and straight — no police got any right to just pull you over like dey pulling cane from a truck. Dem must got cause. Dat mean, unless yuh car looking like it just escape from a crime scene, or yuh driving like yuh blindfold, dem can’t just stop yuh.
De only exception, dem seh, was a road block. But hear how dat suppose to wuk — a senior officer must be in charge. Senior, as in somebody wid a stripe, a rank, or at least a lil grey hair. But these days, dem boys noticing something strange pon de road. Two lil junior constables, fresh outta Eve Leary, setting up dem own “road block” like if dem running a toll gate. All yuh hearing is “Driver, lemme see yuh documents!” — and yuh better hand it over before dem start to invent a charge.
Dem boys seh we need fuh ask de Traffic Chief: wha really is a road block? Is two police and a cone? Is a flashlight and a bad attitude? Or is it something sanctioned and supervised? Because lately, every corner gettin a pop-up “operation” like dem selling cellphone cards.
In dem good old days, when a road block set up, yuh coulda smell de starch pon de officer shirt. Now, de only thing yuh smell is confusion. Some of dem officers don’t even got name tags, far less senior supervision. Dem boys seh is time de Traffic Chief clear up this mystery. Tell we plain — who can set up a road block, and under what authority? Cause right now, every junior rank feel he is Commissioner fuh one corner. And if dis continue, dem boys seh soon drivers gon start setting up dem own road blocks — and ask de police fuh dem documents!
Talk half. Leff half.
Share this:
Discover more from Kaieteur News
Subscribe to get the latest posts sent to your email.
Similar Articles
THE BLUNT OF THE DAY
Sports
Features/Columnists
Sir. Ronald Sanders
The GHK Lall Column
Weekend Cartoon
