Latest update September 16th, 2026 10:20 AM
Latest News
Sun ah bun and rain ah fall
Dem Boys Seh…
Kaieteur News- Dem boys remember de time when was taking dem fuss plane ride. De plane just take off, right? De pilot come on de mic, cool as a cucumber, and seh, “Thank you fuh flying wid we. De weather is…”
Den outta nowhere, man start hollering like he see duppy, “OH GAWD! IT AH BUN MEH!! IT AH BUN MEH!!”
Silence. Dead silence. Whole plane holding dey breath like dey life depend on it.
Two seconds later, pilot come back on, trying fuh sound professional, but yuh could hear de pain in he voice, “Uh…I terribly sorry ‘bout dat. I spill some hot-hot coffee pun meh lap…yuh should see meh pants!”
Before he could finish, a voice from de back ah de plane buss out, “Well, why yuh nah come back here and see WE pants?!”
Everybody fuhget about de weather. Was real drama while it lasted.
Bai, if yuh ever wan know wah real drama look like, just watch Guyana weather. One minute sun ah bun yuh tail like yuh owe it money, next minute rain ah fall like heaven gat a leak.
Is like de weather gat mood swing like yuh ex, and it en care who it inconvenience. Sun ah shine so bright, yuh start fuh wonder if it training fuh de Olympics in heatwave. But hold on! Before yuh pull out yuh sunblock and shades, here come de rain, soaking up everything like it own de place.
But hey, at least de weather keeping life exciting. In Guyana, yuh doan need no Netflix or cable TV. Just sit outside and watch de sky do it ting. Sun, rain, thunder, lightning—is a full-blown production, and we all just extras in de show. So, mek sure yuh gat yuh umbrella, yuh sunscreen, and yuh sense ah humor. Trust me, yuh gon need all three fuh dis rollercoaster ride. Weather fuh so, bai!
How many of y’all remember when de sun shining and de rain falling at the same time, people used to seh dat de devil and he wife fighting?
Talk half. Leff half
(Sun ah bun and rain ah fall)
Share this:
Discover more from Kaieteur News
Subscribe to get the latest posts sent to your email.
Similar Articles
Website Hits
Blunt of the day
Sports
Features/Columnists
Sir. Ronald Sanders
The GHK Lall Column
Weekend Cartoon
