Latest update September 28th, 2026 10:20 AM
Guyana is not a chessboard!
Dem Boys Seh…
Kaieteur News- Dem boys seh Uncle Sam an’ Venezuela start a big fight over oil. Uncle Sam tell Chevron, “No more oil from Venezuela!” Venezuela vex an’ seh, “Oh yeah? Watch dis!”
But instead of squaring off directly, Venezuela tun ‘round an’ pick on lil Guyana. Yesterday, dem send one of dem big-boy navy boat fuh trespass in we waters, right near de FPSO. It nah accident. It nah lost. It was a message.
Venezuela telling Uncle Sam: “Just how you could bruk up business in we backyard, we could bruk up yuh business in Guyana!” Tit-for-tat. Except, de “tat” was in we Exclusive Economic Zone, not in Washington, not in Texas—right here, in we backyard.
Guyana is a sovereign nation, not a chessboard fuh big-power games. But every time two big boys get in a quarrel, is we who feel de pressure. One side deh threatening, one side pretending fuh help, but all dem really care ‘bout is de oil.
Dem boys seh de same way you don’t slap de neighbor pickney because yuh vex wid he father, you don’t use Guyana as a pawn in y’all big oil quarrel. If Venezuela get problem wid Uncle Sam, then deal wid Uncle Sam straight. But no! Dem prefer intimidate Guyana, de smallest one in de whole bacchanal.
Dem boys seh is high time we stop getting squeeze in these big-man fights. Because every time Uncle Sam sneeze, Venezuela does start cough, and Guyana does end up wid a flu!
Talk half! Leff half!
(Guyana is not a chessboard!)
Share this:
Discover more from Kaieteur News
Subscribe to get the latest posts sent to your email.
Similar Articles
Website Hits
Blunt of the day
Sports
Features/Columnists
Sir. Ronald Sanders
The GHK Lall Column
Weekend Cartoon
