Latest update August 1st, 2026 12:35 AM
Latest News
Doc Gone, App Tek Over!
…Dem Boys Seh
Kaieteur News-Dem boys seh de days of running to de doc fuh lil sniffle or bellyache gan soon done! AI come in, and it ain’t coming slow like payday—it coming fast, like dem minibus drivers on de seawall road.
In de next ten years, you nah guh even need fuh look pon a doc face. Yuh gon just sit down pon yuh bed, log in pon yuh computer or yuh phone, type in yuh symptoms, and bam! De AI gon tell yuh wha wrong wid yuh. Yuh hand itch? AI gon seh it’s money coming or some lil rash. Yuh head hurt? AI gon ask if yuh drink enough water or if yuh just vex wid life. And before yuh blink, it gon send yuh prescription straight to de pharmacy. Yuh nah even gotta leave yuh yard.
Dem boys seh de docs trembling like de old Demerara Bridge when big truck pass. Because if dis AI ting tek off, dem docs might haffi start selling cook-up fuh survive. Imagine paying fuh diagnosis like how yuh pay fuh de cheap internet package—quick, cheap, and efficient. De app nah gon mek yuh wait three hours in a waiting room wid bawling pickney and a TV stuck pon children cartoons.
But leh we talk money. Going to a doc does drain yuh pocket faster than a pothole does mash up a tyre. AI app gon save yuh cash. It cheap like de $300 curry lunch from de roadside vendor.
Still, dem boys seh not all roses. Who yuh gon blame if de AI mek mistake? Yuh can’t cuss out an app or threaten fuh change yuh doctor. And AI nah gon pat yuh pon yuh back and seh, “Don’t worry, yuh gon be fine.” It cold like de AC in dem big-shot office.
Dem boys seh docs better learn to live wid AI. If not, dem gon haffi start competing. Maybe throw in a free lollipop or a foot massage wid every visit! But one ting sure, de AI era coming. Whether yuh like it or not, dem docs betta brace, cause technology nah play.
De future bright, but some docs gon feel it dark. As Granny used to seh, “Tek in front before in front tek yuh.”
Talk half. Leff half\-
( Doc Gone, App Tek Over!)
Share this:
Discover more from Kaieteur News
Subscribe to get the latest posts sent to your email.
Similar Articles
Blunt of the day
Sports
Features/Columnists
Sir. Ronald Sanders
The GHK Lall Column
Weekend Cartoon
