Latest update October 22nd, 2026 6:44 PM
Latest News
Some people got nerves like wire
Kaieteur News – You know dem type? Dem ain’t get no invite, but once dem see a crowd, dem ready fuh show up. Is like dem got radar fuh free food and drink.
One man tell me he see a fella at a big gathering recently. De man was walking round like he own de place. Eating de food, drinking de drink, and laughing up loud. So somebody ask he, “Who you related to?”
He puff up he chest and seh, “De birthday boy.”
Well, is only after dat, he find out he at a wake. De man tek off like a bullet from a gun.
Dem boys seh is not de first time this happen. People in Guyana got a habit. Dem don’t care if is wedding, funeral, christening, or even a wake. Once dem see a tent and chairs, dem inside like lice on a jumbie.
Some does even dress up and come fuh tek pictures, post on Facebook like dem was really invited. Dem go ask fuh de wi-fi password like dem paying de bill.
Dem boys seh is a real problem. One time, a man show up at a wedding. He dance, he eat, he even catch de bouquet. Only fuh de bride to realize later dat she don’t know he.
Dem boys seh it gat to stop. People need to have manners. If yuh ain’t get no invite, stay home and eat yuh own food. Some people now quoting law fuh get in to places dem nah get invitation to.
But you know how Guyanese stay. Dem see a crowd and dem curious. Like fly to a roti.
Dem boys seh, next time yuh see one of dem uninvited guests, don’t say nothing. Just give dem de look. De same look you does give when de electricity bill come high.
Maybe den dem gon learn. Or maybe not. But at least you had a good laugh when dem mix up de birthday with de wake.
Talk half. Leff half!
Share this:
Discover more from Kaieteur News
Subscribe to get the latest posts sent to your email.
Similar Articles
Website Hits
Blunt of the day
Sports
Features/Columnists
Sir. Ronald Sanders
The GHK Lall Column
Weekend Cartoon
