De crowds was lighter dan a drizzle

Aug 07, 2023 Dem Boys Seh, Features / Columnists

Dem Boys Seh…

Kaieteur News – De cricket fans made a statement yesterday. De cricket fans did playing hide-and-seek. Instead of a sold-out crowd, de stands looked as empty as a GT police station in de night.

Guyana is now a high-income country. And de cricket authorities decide fuh charge supersonic prices. Is like dem think Guyanese sleeping with gold bars under dem bed. Dem nah realize dat while de country rich, de people poor. De price of a ticket in de green stand was more than a week pay fuh dem sugar workers.

But dem boys pay de $12,500 because dem boys seh with dat price yuh gat to be getting free, food and drinks. Or at least a backstage pass fuh meet de cricketers. Dem boys go early expecting a huge rush but was disappointed. De cricket man di seh dem had a rush fuh tickets. But dem boys think he nah see right.

With CPL coming up, de die-hard fans had to mek a choice, is either de CPL or de India series. De money cannot stretch fuh both. Things tight in de people pocket and money as precious as umbrella during El Nino.

At one-point, dem boys thought was de wrong day. Dem boys had to check de date two to three times. Is like if dem boys did attending a local club match. Even de tapeball matches drawing better crowds. De attendance was lighter than a drizzle.

De people stay away. De price of de ticket too high fuh de disposable income dat de government seh increase.

Talk half. Leff half.

Discover more from Kaieteur News

Subscribe to get the latest posts sent to your email.

Latest News