De indiscipline has returned; some say it never leff

Jan 17, 2023 Dem Boys Seh, Features / Columnists, News

Dem Boys Seh…

Kaieteur News – When dem boys bin small if somebody cough too much in de cinema, de person in front of and next to dem used to get up and move to another section. And dat teach dem boys a lesson: if yuh gat cough or running nose nah go out in public.

Dat lesson prove useful during de pandemic. If somebody cough in public, people nah move. Dem used to scatter. If de person sneeze, umbrella used to open.

Some people did frighten fuh even clear dem throat in public for fear of causing mass stampede. But Guyanese people memory short. Even after almost 1300 dead from de COVID-19 virus, people now start fuh go out in public and dem coughing and blowing dem nose in front of odder people.

Some of dem nah gat shame. Dem hear about food sharing at wedding house and birthday party and dem decide dat cough or no cough, dem gat fuh go and full dem belly.

Dem nah kay dat dem might transmit something to dem lil pickney wah deh about, or worse yet pass on something to some elderly persons. De indiscipline start back.

Some people gat symptoms and nah going and get tested. Dem claiming how dem gat flu and cold. Well, we all know dat de flu and cold do often mimic de symptoms of de COVID-19.

But nah tell dat to dem wah going with cough and running nose to de cinema and to wedding house and birthday. As far as dem concerned, de pandemic done and things return to normalcy. Till de surge return with a fury!

Talk half. Leff half!

Discover more from Kaieteur News

Subscribe to get the latest posts sent to your email.

Latest News