Dem Politicians hiding from de press!

Dec 25, 2022 Dem Boys Seh, Features / Columnists, News

Kaieteur News – Merry Christmas to one body and everybody! Dem boys hope that all of you have a safe Christmas and nah overdo. Dem hope some of ya’ll nah start looking through yuh window at yuh neighbour because yuh eye might not see what yuh like

Lang ago it looked as if dem Politicians bin peeping. Dem bin using telescope fuh peep pun yuh. No matter weh yuh deh and what yuh doing, dem peeping yuh.

As de man seh in de song, even if yuh try fuh hide in yuh verandah, dem coming with helicopter fuh peep yuh. When yuh think yuh sleeping, dem deh behind curtain peeping. And when yuh bathing in de sea, dem coming with submarine with dem peeping.

Well it look as if de peeping done and de hiding tekkin place. Now it look as if dem Politicians hiding from de press

De Prezzy like talk but he nah like hold Press Conference. Dem boys boxing dem brains fuh remember when last he keep a Press Conference. De man trying fuh outdo Souljah Bai who hardly used to keep Press Conferences. Is like de Prezzy blaming a game with de media: the more you see me, is the less yuh know!

But de more de Government hide, de more dem getting expose. De Waterfall Boss man exposing everything about de oil deal. And when he turn up at Press Conference, dem does tell he fuh hurry up and ask he question. And dem does claim how he shaart but he story long. But de man gat dem pun dem toes.

He waking dem up and he waking up de country! No wonder dem hiding!

Talk half. Leff half!

Discover more from Kaieteur News

Subscribe to get the latest posts sent to your email.

Latest News