We all living like jailbird

Dec 06, 2021 Dem Boys Seh, Features / Columnists

Kaieteur News- We all does live in prisons. We does lock we gate when we leff home. We gat barbed-wire and razor-wire pun we fence. CCTV cameras deh all round de perimetres of we yard. Alarm systems connect to we doors and windows and steel grills locking we in de home when night fall and even during de day. We living like real jailbirds.
If we gat emergency, we can’t get out easily. Some nah get out at all. Like dat famous Indian dancer who used to live in Kitty. She house ketch afire. She get roast alive because she could not open de door, and de windows bin all grill up.
Nuff people we all know who can’t escape fire because dem house tun steel cages.
And is all because ah de crime situation! If it didn’t have so much crime, you woulda bin able to leff yuh gate and doors open and no bars pun yuh windows. We all tun victims of crime.
And when yuh guh to de market or to de store or to de supermarket and you ask yourself why dem prices so high, you must remember dat is de crime cause dat. Every business gat fuh cater fuh de day dem gan get rob. And suh dem have to put a little mark-up fuh cater fuh such contingencies.
Dem farmer does plant and other people does reap. De farmer gat fuh charge a li’l extra fuh compensate fuh dem wah tiefing from he.
Talk half and nah laugh at jailbird when yuh living in steel cage!

Discover more from Kaieteur News

Subscribe to get the latest posts sent to your email.

Latest News