Nuff people nah like wuk

Jun 26, 2021 Dem Boys Seh, Features / Columnists

Dem Boys Seh…

Kaieteur News – We nah got a shortage of wuk in Guyana. We gat a shortage of certain types of wuk. And we gat an even greater shortage of people wah want to wuk.
Dem picknee leffing school with plenty, plenty subjects, and dem can’t find de type of office wuk dem want. But is not like we gat a serious employment crisis in de country. Because right now dem boys looking fuh some construction workers and is only dem Cubans and dem Haitians willing fuh turn spade and push wheel barrow.
Workers hard fuh come by. And dem eye big. Dem labourers calling $7,000 minimum per day. And if yuh know fuh use a hammer and a nail is $9,000 per day. And dem gan skin-cock pun de wuk. But dem know fuh pack dem toolboxes quick, quick when 4:00pm meet and if yuh ask dem fuh stay and finish off some wuk, is time-and-a-half dem calling.
And don’t mek de mistake of paying dem pun a Saturday. Dem gan drink all weekend and nah gan turn up until Tuesday or Wednesday. Dat is why dem boys payday does be on a Monday.
And nuff of dem workers smoking pun de wuk… and is not cigarette. If dem nah tek a puff dem nah gat energy fuh wuk. If dem nah get a hit, dem nah gat strength fuh wuk. So dem does smoke-up in de morning and smoke-up after lunch. Otherwise, dem slower dan a turtle.
One time one of dem carpenter get arrested during a drug raid by de police. He guh in front of de magistrate who said to him: “You were arrested during a drugs bust in a gambling den. What were you doing there?”
“Making a bolt for the door, your Honour!”
Talk half and nah complain how wuk nah deh!

Discover more from Kaieteur News

Subscribe to get the latest posts sent to your email.

Latest News