Snatch-and-run on the increase

Oct 09, 2020 Dem Boys Seh, Features / Columnists

Dem Boys Seh…

A woman borrow G$10,000 yesterday. She put it in her purse and den put de purse in she bag. By de time she reach two corners away, somebody snatch de bag and run.
Dis is wah happening all over de place. Criminals snatching and running. Dem doing to de people wah dem see dem farrin company doing to de government. Dem farrin company snatching we wealth and running. And leffin we poorer.
Dem nurse bin protest fuh a miserly monthly $5,000 risk allowance. Dem wan be considered as frontline workers even though nat all ah dem treating COVID patient. But is suh when yuh see yuh mattee get something. When yuh neighbour buy new blinds, you does want change you own to.
Dem nurses protesting de wrong thing. Dah $5,000 wah dem fighting fuh every month can’t even buy a large bottle of sweet drink every day. Dem should be protesting and asking wah happen to de US$55B wah bin leff pon de negotiating table.
If we bin get dat money, de nurses nah gat to worry about risk allowance. Dem nah even gat to worry about wukkin. Dem could stay home and receive dem cash grant envelope every month. We would have been able to hire nurses from outside of Guyana if we bin get dat money. And all of we could ah kack up we foot and relax all day.
But we fighing fuh de wrong thing. And we fighting de wrong people. We fighting with each other rather than fighting fuh a better deal from dem farrin company wah snatching and running away with we wealth.
Talk half and hold on tight to yuh bag when yuh walking pon de road.

Discover more from Kaieteur News

Subscribe to get the latest posts sent to your email.

Latest News