Foreigners tekking over Guyana

May 15, 2019 Dem Boys Seh, Features / Columnists

Guyana deh in a position wheh everybody looking at it. A British reporter come and spend couple days. When he lef he write how Guyana can be de richest country in de world. And from de time people read that is suh dem coming.
If de census people was to do a count now, dem gun find that Guyana got two million people. If dem check de language dem gun seh most of de people talking Chinese, followed by Portuguese followed by Spanish.
Anyhow, while people coming to enjoy de benefits dem oil people studying how to rob de country. De Waterfalls boss man like dem oil lady who don’t trust nobody. Since you put foot in Guyana he peeping to see if you bring any money and wha kind of investment you do.
A gold company decide to cut out Guyana from de hustle suh it buy it own plane. Dem boys didn’t vex. Dem seh it wouldn’t last long because dem couldn’t service de plane in Guyana. De insurance seh suh. Every time dem got to service de plane dem had to fly it to Canada.
Yesterday dem boys hear dem sell de plane. And dem ain’t sell it to any Guyanese. Now don’t ask wha dem gun do fuh plane. Old people always seh de same stone de builder reject does be de key cornerstone.
Dem tun back to local air services. That is one turnaround just like de man who deh in de lockups because de police believe he kill he wife.
Nuff people married; nuff people and dem spouse quarrel but most people know when to shut dem mouth. Couple of dem does beat dem wife because dem can beat she. But if she got a big strong brother nobody don’t touch her because touch got touch back.
But this man use to beat he wife. She move out; then she go to court and tell de magistrate how she don’t want problem.
De same man she refuse to jail mek sure she can’t even point a finger in he face.
Talk half and watch how Guyana getting tek over.

Discover more from Kaieteur News

Subscribe to get the latest posts sent to your email.

Latest News