Irfaat open he mouth and sorry

Apr 13, 2019 Dem Boys Seh, Features / Columnists

Is only time before Irfaat hold a press conference but dem boys seh is better he didn’t hold one. De man walk wid Kwame just like how Jagdeo use to walk wid Kwame. Luncheon also use to walk wid Kwame to he press conferences suh it got to be that Kwame is some specialist.
Irfaat decide that he gun answer as little questions as possible suh he write an essay. It tek him 51 minutes to read de essay. And de press conference was only fuh one hour.
But old people seh, ‘Stricter de government, de wiser de population’. Some odda people does quick to remind people bout de smart fly. Irfaat was de smart fly on Thursday. Dem boys know he would try hiding any question about he qualifications but dem reporters like alligator. Dem got patience.
Dem sit down and wait till he done read he essay. Then de question come. De man mek dem boys shame. Every question he answer, “De Opposition Leader done talk bout that.” Dem ask bout he qualifications and he seh de Opposition leader talk bout that and he, Irfaat, ain’t got nutten to seh.
People woulda tun dem face and ask bout something else but is when de man seh how he travel de country and he now know wha de people suffering. This was a Minister fuh nearly ten years. This was a man who was link to Jagdeo skirt tail, and he didn’t know what was going on in de country.
Dem boys seh he is really M.I.A. and that don’t mean Mohamed Irfaan Ali. It mean Missing In Action. He had to be missing from reality. If that is to be de new president dem boys got nuff to write about and people gun always be talking.
And Kwame deh hollering and barking at e very reporter who ask Irfaat a question like how a dog does deh barking when he deh by he massa foot and he want to mek he massa feel happy.
Jagdeo train Irfaat well, right down to keeping Kwame pun a leash.

Discover more from Kaieteur News

Subscribe to get the latest posts sent to your email.

Latest News