Dem MPs getting screw behind de barricades

Dec 13, 2018 Dem Boys Seh, Features / Columnists, News

Every time dem got Parliament, de whole city in chaos and confusion. When de coalition was in de Opposition, dem promise to get rid of all dem barricade round Public Buildings.
Dem promise not to disrupt de city de way de PPP use to have barricades.
De same APNU+KFC seh nobody in deh not dat important fuh want all dat security precaution.
In fact, each one of dem in Parliament got dem own disability walking around wid. Who nah got proppa eye, hard of hearing. Some can’t bend down fuh tie dem shoe lace; some got skittle foot and some brainless.
Today, dem in charge and instead dem remove de barricade wuh people could have a free flow of traffic, dem widen de barricade tekking over de city.
If somebody want lef de court to go to LaPenitence Market, dem got to go up de East Coast and use de dam wha Fine Man use to travel to get to East Bank.
Who live pon de East Bank and want go to court, got go cross de Harbour Bridge to Vreed-en-Hoop and tek a ballahoo or a canoe to come over.
Wid dis type of barricade fuh lock in demself, one would think dem Mofos mekking decision to put Guyana into de First World next week.
Look wheh Guyana deh today, 52 years later after so much barricade, one after de odda. Dem sit down in Parliament and look wha dem give Guyana, a repainted airport wheh dem change couple zinc sheets fuh US$150M.
Dem boys she, dem got Guyanese who can tek dat same US$150M and build three airports, one fuh Timehri, one fuh Berbice and one fuh Essequibo.
And dem boys not talking bout changing zinc sheets; dem talking bout building from scratch, bigger and better airports.
Dem sit down behind dem barricades and still don’t know how much foreign people robbing Guyana blind in de back dam.
Dem sit down deh behind de barricade and allowing de oil company to screw dem plus Guyana front, back and centre.
Talk half and remember moving de barricade was anodda promise. It yet to be fulfilled by APNU+KFC.

Discover more from Kaieteur News

Subscribe to get the latest posts sent to your email.

Latest News